Երազիր, որ իրականանա...

Աշխարհի ամենահեղինակավոր գիտահետազոտական կենտրոններում աշխատող հոգեբանները, ուսումնասիրելով մարդկային հոգեբանությունը և դրա անմիջական կապը տարվա եղանակների և օրերի հետ, եկել են համոզման, որ տարվա մեջ կա մի օր, որը կարելի է համարել երազանքների իրականացման օր:

Այդ օրը պետք է լինի արևոտ, պայծառ, տաք,օդը պիտի լցված լինի թարմությամբ ու ոգևորող աշխուժություն պետք է տիրի շրջապատող բնության մեջ: Չգուշակեցի՞ք, թե որ օրն է: Դա երազանքների իրականացման օրն է` մայիսի 2-ը: Համոզված եմ, որ հենց այդ օրը իրականանում են բոլոր նվիրական երազանքները, աշխարհում միլիոնավոր մարդիկ հայացքները ուղղում են երկինք ու պահում իրենց երազանքը: Իսկ գիտե՞ք, թե ինչ է երազանքը: Երազանքը... Մի զույգ բարի աչքեր, որ նայում են աստղային երկնքին, երկու ձեռքեր, որ պարզվում են երկինք, ինչ-որ ակնկալիքով, իսկ ավելի ճիշտ` երազանքը աստղերն են, որ փայլում են երկնքում և երբեք հասանելի չեն:

Իսկ գիտե՞ք, թե ո՞րն է տարբերությունը երազանքի և նպատակի միջև: Նպատակներ դնում ենք մեր դեմ և պարտավոր ենք իրականացնել, որովհետև դրանք մեր ուժերի սահմանում են, իսկ երազանքները կարող են այդպես էլ չիրականանալ, որովհետև երազանքները իրականացնում ենք ոչ թե մենք, այլ մեր ճակատագիրը: Իսկ ամենամեծ տարբերությունը նպատակի և երազանքի միջև այն է, որ նպատակը ունի երկու բևեռ` չար և բարի, վնասող և նպաստող, մինչդեռ երազանքը հենց ներդաշնակությունն է, ոչ մեկի երազանքը չի կարող վնասել մեկ ուրիշին, որովհետև նպատակը երբեմն կարող է ամպրոպաբեր թուխպերի պես մթությամբ պատել երկինքը, մինչդեռ երազանքները փոքրիկ, սպիտակ ամպիկներ են, որ միայն գեղեցկացնում են երկինքը: 

Ինչի՞ մասին են մարդիկ ամենից հաճախ երազում, գուցե մեծ հարստությա՞ն, համբավի՞ կամ սիրո՞: Իմ կարծիքով դրանք ոչ թե երազանքներ, այլ նպատակներ են, որոնք իրականացնելու համար անհրաժեշտ է միայն շատ աշխատել: Իրական երազանքներ են աղետներից ու պատերազմներից խուսափելը, կրկին տեսնելը հարազատին, ում կորցրել ենք, պատկերացրեք, ինչ մեծ երազանք է` մի օր արթնանալ ու հասկանալ, որ լիարժեք երջանիկ ենք: 

Աշխարհում ապրում են միլիոնավոր մարդիկ, նրանք բոլորը երազում են, ուրեմն աշխարհում երազանքներն էլ շատ են : Երազանքները միայն բարի են լինում, ուրեմն կարելի է ասել, որ մեր աշխարհը դեռ լի է բարությամբ:

Հարցեր, պատասխաններ, մեկնաբանություններ